Kryetari i Partisë Demokratike, Sali Berisha, ka bërë thirrje për përshkallëzim të protestave kundër qeverisë, duke deklaruar se opozita ndodhet “në kilometrin e fundit” të betejës politike për largimin e kryeministrit Edi Rama.
Gjatë mbledhjes me Kolegjin e Kryetarëve, Berisha akuzoi kreun e qeverisë për kapje të drejtësisë, përfshirje në afera korruptive dhe bllokim të hetimeve ndaj zyrtarëve të lartë. Sipas tij, mazhoranca ka mbyllur mekanizmat e kontrollit parlamentar dhe ka dëmtuar seriozisht funksionimin demokratik të vendit.
Lideri demokrat u ndal edhe te procesi i integrimit europian, duke pretenduar se qeveria ka krijuar probleme në raportet me Bashkimin Europian, ndërsa akuzoi Ramën për qëndrime antikombëtare në raport me presidentin serb Aleksandër Vuçiç.
Në fjalën e tij, Berisha foli edhe për ekonominë, duke thënë se rritja ekonomike e raportuar nga qeveria nuk reflektohet te qytetarët, por sipas tij përfiton një rreth i ngushtë i lidhur me pushtetin. Ai përmendi varfërinë, rënien e investimeve të huaja dhe aferat korruptive si djegësat dhe portin e Durrësit si shembuj të keqqeverisjes.
Berisha kërkoi mobilizim të plotë të strukturave të PD-së, shtim të anëtarësimeve, komunikim më të fortë me qytetarët dhe angazhim më të madh në rrjetet sociale, të cilat i cilësoi si armë kyçe përballë propagandës qeveritare. Ai theksoi se protesta mbetet mjeti kryesor i opozitës deri në largimin e Edi Ramës nga pushteti.
