Irani ka lëshuar për herë të parë një raketë me rreze të gjatë veprimi që mund të arrijë deri në 4000 kilometra, në kuadër të përshkallëzimit të tensioneve ushtarake në rajon.
Sipas ushtrisë izraelite, kjo raketë ka potencialin të godasë jo vetëm objektiva në Lindjen e Mesme, por edhe kryeqytete europiane si Londra, Parisi dhe Berlini.
IDF: Kërcënim global në rritje
Shefi i ushtrisë izraelite, Eyal Zamir, deklaroi se Irani po zhvillon kapacitete që përbëjnë një kërcënim të drejtpërdrejtë për dhjetëra vende.
Sipas tij, gjatë operacioneve të fundit është konfirmuar se Teherani synon të zgjerojë ndjeshëm rrezen e goditjes së arsenalit të tij raketor.
“Regjimi iranian përbën një kërcënim global. Tani raketat e tij mund të arrijnë edhe në Europë”, theksoi Zamir.
Goditje drejt bazës amerikane në Oqeanin Indian
Autoritetet izraelite bëjnë me dije se një nga raketat është lëshuar drejt një objektivi amerikan në ishullin Diego Garcia, duke konfirmuar përdorimin e teknologjisë balistike ndërkontinentale me dy faza.
Sipas tyre, këto raketa nuk janë të destinuara vetëm për Izraelin, por kanë një rreze që përfshin një pjesë të madhe të Europës.
Operacioni ushtarak në mes të rrugës
Shefi i IDF deklaroi se operacioni ushtarak kundër Iranit është rreth gjysmës së realizimit dhe se sulmet e fundit kanë dobësuar ndjeshëm kapacitetet e Teheranit.
Ai shtoi gjithashtu se janë miratuar plane të reja për operacione kundër Hezbollahut në Liban, duke theksuar se çdo kërcënim do të trajtohet në mënyrë operative.
Bashkëpunim i ngushtë me SHBA
Zamir nënvizoi rëndësinë e bashkëpunimit me Shtetet e Bashkuara, duke e cilësuar atë si një faktor kyç në operacionet aktuale ushtarake.
“Bashkëpunimi strategjik me aleatin tonë është një forcë e madhe në këtë fushatë”, u shpreh ai.
