Kryeministri Edi Rama zhvilloi këtë të hënë një takim në qytetin bregdetar të Vlorës me deputetë të zonës dhe përfaqësues të pushtetit vendor, në prag të nisjes së sezonit turistik.
Burime bëjnë me dije se takimi u mbajt në zonën e Plazhit të Vjetër. Rama qëndroi për rreth një orë në një nga lokalet e zonës, ndërsa më pas u largua drejt Tiranës.
Takimi është organizuar nga vetë kryeministri dhe në të kanë marrë pjesë disa deputetë dhe drejtues lokalë.
Gjithashtu në takim ishte e pranishme edhe kryetarja e Bashkisë së Vlorës, Brunilda Mersini, së bashku me tre nënkryetarët e bashkisë, si dhe deputetja e Vlorës dhe njëkohësisht ministre për Marrëdhëniet me Parlamentin, Erjona Ismaili.
Sipas burimeve, gjatë takimit është diskutuar për investimet që po kryhen në qytet dhe për përgatitjet në kuadër të sezonit turistik, ndërsa kryeministri ka lënë edhe detyra konkrete për drejtuesit vendorë dhe deputetët e zonës.
