SHBA dhe Izraeli kanë nisur një operacion të përbashkët ushtarak kundër Iranit, në një përshkallëzim dramatik të tensioneve pas javësh kërcënimesh dhe negociatash për programin bërthamor iranian.
Presidenti amerikan Donald Trump konfirmoi përfshirjen e SHBA-së, duke deklaruar se kanë nisur “operacione të mëdha luftarake” dhe se objektivi është parandalimi i Iranit për të siguruar armë bërthamore. Ai i bëri thirrje forcave iraniane të dorëzojnë armët dhe u kërkoi qytetarëve iranianë të qëndrojnë në strehë.
Nga ana tjetër, kryeministri izraelit Benjamin Netanyahu e cilësoi sulmin si të domosdoshëm për të parandaluar që Irani të pajiset me armë bërthamore dhe u bëri thirrje iranianëve të “marrin fatin në duart e tyre”.
View this post on Instagram
Çfarë ka ndodhur në terren?
Shpërthime janë raportuar në Teheran pak pas orës 09:30 me orën lokale, me re tymi të dukshme mbi disa zona të kryeqytetit. Raporte për shpërthime kanë ardhur edhe nga qytete të tjera si Isfahan, Qom, Karaj dhe Kermanshah. Deri tani nuk ka të dhëna të konfirmuara për viktima.
Hapësira ajrore e Iranit është mbyllur, ndërsa Izraeli ka shpallur gjendje të posaçme emergjente dhe ka pezulluar fluturimet civile.
Reagimi i Iranit dhe përplasjet rajonale
Ushtria izraelite ka raportuar se ka identifikuar raketa të lëshuara nga Irani drejt Izraelit, duke aktivizuar sistemet e mbrojtjes ajrore. Shpërthime janë dëgjuar në Haifa dhe zona të tjera, por mbetet e paqartë nëse bëhet fjalë për goditje direkte apo për interceptime.
Në rajon, Bahrejni raportoi se një qendër e flotës së 5-të amerikane është vënë në shënjestër, ndërsa Katari njoftoi se ka neutralizuar disa sulme mbi territorin e tij. Baza Al Udeid në Katar, një nga objektet më të mëdha ushtarake amerikane në Lindjen e Mesme, mbetet nën masa të larta sigurie.
Kaos në hapësirën ajrore
Disa kompani ajrore ndërkombëtare kanë pezulluar fluturimet në Lindjen e Mesme. Lufthansa, Wizz Air dhe Virgin Atlantic kanë anuluar ose devijuar fluturime, ndërsa disa vende, përfshirë Irakun dhe Jordaninë, kanë mbyllur hapësirën ajrore.
Autoritetet britanike kanë këshilluar qytetarët të qëndrojnë vigjilentë dhe të ndjekin udhëzimet e autoriteteve lokale në disa vende të rajonit.
Situata mbetet në zhvillim, me rrezikun e përhapjes së konfliktit në një rajon tashmë të tensionuar.
