Ka nisur edicioni i 76-të i Festivalit të Sanremos, me një mbrëmje të parë shumë të gjatë që përfundoi rreth orës 01:30. Spektakli u drejtua nga Carlo Conti, i shoqëruar nga fituesi i vitit 2025 Olly dhe bashkëprezantuesja e javës, Laura Pausini.
Takimi i dy “Sandokan”
Një nga momentet më të veçanta ishte takimi mes aktorit turk Can Yaman, protagonisti i ri i serialit “Sandokan”, dhe aktorit indian Kabir Bedi, i cili luajti rolin legjendar në vitin 1976. Dy “Sandokanët” u përballën në skenën e Aristonit në një moment nostalgjik që u prit me shumë duartrokitje.
25 vjet nga “Perdono”
Super i ftuari i mbrëmjes ishte Tiziano Ferro, i cili festoi 25-vjetorin e hitit të tij “Perdono”. Interpretimi i tij ishte emocional dhe u konsiderua një nga kulmet e natës së parë.
Në skenë u ngjit edhe 105-vjeçarja Gianna Pratesi, për të kujtuar 80-vjetorin e ardhshëm të Republikës Italiane.
—
Këngët në garë dhe renditja e parë
Gjatë mbrëmjes u dëgjuan për herë të parë të 30 këngët në garë. Pas votimit të jurive të shtypit, radios dhe medias online, pesë vendet e para provizore i morën:
Arisa
Fulminacci
Serena Brancale
Ditonellapiaga
Fedez & Marco Masini
Festivali do të vazhdojë deri të shtunën, kur do të shpallet fituesi i edicionit 2026.
