Presidentja e Kosovës, Vjosa Osmani, ka konfirmuar se synon edhe një mandat tjetër në krye të shtetit, teksa mandati i saj aktual përfundon në prill të vitit 2026. Në një intervistë për Radio Evropa e Lirë, Osmani u shpreh se qëllimi i saj është “t’i vazhdojë punët e mira për qytetarët e Republikës së Kosovës”, duke theksuar se vendimi përfundimtar i takon Kuvendit.
Osmani tha se pret formimin e institucioneve të reja pas zgjedhjeve të parakohshme parlamentare dhe konfirmoi se do të zhvillojë bisedime si me shumicën, ashtu edhe me opozitën për kandidaturën e saj. Ajo shtoi se nuk kërkon mbështetje nga Lista Serbe, ndërsa theksoi rëndësinë e vazhdimësisë institucionale në një kontekst të ndjeshëm gjeopolitik.
Presidentja komentoi edhe raportet me kryeministrin në detyrë Albin Kurti, duke pranuar se kanë pasur dallime në qasje, por jo në qëllime strategjike, si forcimi i sovranitetit dhe integrimi euroatlantik. Në politikën e jashtme, Osmani vuri në dukje marrëdhëniet me SHBA-në dhe BE-në, dialogun Kosovë–Serbi dhe pritshmëritë për heqjen e masave të BE-së ndaj Kosovës.
