Komisioni Qendror i Zgjedhjeve (KQZ) ka publikuar të dhënat zyrtare mbi pjesëmarrjen e qytetarëve në zgjedhjet parlamentare, deri në orën 17:00.
Sipas të dhënave të përditësuara në platformën zyrtare të KQZ-së, janë procesuar 97.54% e vendvotimeve, ndërsa pjesëmarrja në rang vendi ka arritur në 38.01%.
Kjo nënkupton se deri në këtë orë kanë votuar gjithsej 759.877 qytetarë me të drejtë vote, nga rreth 2 milionë votues të regjistruar në listën zgjedhore.
KQZ bën me dije se procesi i votimit po zhvillohet normalisht në shumicën e komunave të Kosovës, ndërsa të dhënat për pjesëmarrjen po përditësohen në kohë reale. Harta e publikuar nga KQZ pasqyron nivelin e daljes në votime në të gjitha komunat e vendit, duke treguar diferenca mes zonave urbane dhe atyre rurale.
Vendvotimet qëndruan të hapura deri në orën 19:00.
Dalja më e madhe është regjistruar në komunat në veri, të banuara me shumicë serbe, ndërkaq në kryeqendër, Prishtinë, dalja deri në orën 17:00 ishte 45.59 për qind.
