Pas disa javësh hetimesh me metoda proaktive, Drejtoria Vendore e Policisë Elbasan ka finalizuar me sukses operacionin policor të koduar “Rented”, zhvilluar nga Seksioni për Hetimin e Trafiqeve në bashkëpunim me Seksionin për Mbështetjen Operacionale, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan.
Si rezultat i këtij operacioni u arrestuan në flagrancë dy shtetase nga Kazakistani, të cilat ushtronin prostitucion në dy apartamente të marra me qira në qytetin e Elbasanit.
Po ashtu, është proceduar penalisht pronarja e apartamenteve, një 39-vjeçare që i kishte dhënë ambientet me qira.
View this post on Instagram
Të arrestuarat dhe provat e sekuestruara
Policia bëri të ditur se në pranga kanë rënë:
- Z. M., 37 vjeçe, banuese në Kazakistan;
- N. S., 38 vjeçe, banuese në Kazakistan.
Të dyja akuzohen për veprën penale “Prostitucioni”, ndërsa pronarja e apartamenteve, M. C., 39 vjeçe, banore në Elbasan, procedohet penalisht për veprën penale “Mbajtja e ambienteve për prostitucion”.
Gjatë kontrolleve në dy apartamentet u sekuestruan shuma parash në valuta të ndryshme, celularë dhe dokumente identifikimi, të dyshuara si prova materiale të aktivitetit të paligjshëm.
Hetimet vijojnë
Në drejtimin e Prokurorisë, vijon puna për dokumentimin e plotë të veprimtarisë kriminale dhe për identifikimin e mundshëm të personave të tjerë të përfshirë në këtë rrjet.
Materialet procedurale janë referuar pranë Prokurorisë së Elbasanit për veprime të mëtejshme ligjore.
