Vajza e poetit të madh Lasgush Poradeci, Maria Poradeci, ka shpërthyer në një reagim të fortë në rrjete sociale, duke denoncuar atë që e quan “32 vite vuajtje, padrejtësi dhe korrupsion” për një pronë familjare në qytetin e Pogradecit.
Sipas saj, bëhet fjalë për një copë toke në lulishte “1 Maji”, vetëm disa metra larg një lokali privat, e cila – sipas dokumenteve që ajo zotëron – i përket familjes Poradeci që nga koha e Mbretit Zog.
“Kam dokumenta që nga koha e Zogut. Kam fituar në tre shkallë gjykate për të drejtën e parablerjes dhe për kontrata të pavlefshme. Por prej 32 vitesh nuk gjej drejtësi, sepse paraja i ka bërë bllok çdo rruge ligjore,” – shkruan ajo.
Maria Poradeci thekson se, pavarësisht vendimeve gjyqësore të formës së prerë në favor të saj, institucionet shtetërore nuk i kanë zbatuar, duke lejuar që një subjekt privat të vazhdojë aktivitetin në pronën e saj.
“Ai që e përdor pronën time si biznes fiton para mbi tokën time dhe paguan me to çdo shtetar. Tridhjetë e dy vjet – një jetë. Kam fituar në çdo gjykatë, por padrejtësia vazhdon. Shteti hesht, institucionet janë të kapura. Kurvëria e këtij sistemi nuk njeh fund,” – shkruan ndër të tjera vajza e poetit.
Në reagimin e saj të gjatë, Maria Poradeci ngre pyetjen e dhimbshme:
“Tridhjetë e dy vjet gjyqeve, zyrave dhe nuk gjej të drejtën. Si duhet të sillem unë?”
Çështja e saj është një nga dhjetëra raste që për vite me radhë kanë mbetur peng i zvarritjeve gjyqësore dhe moszbatimit të vendimeve për pronat, duke rikthyer në qendër të vëmendjes një plagë të vjetër të sistemit të drejtësisë shqiptare.
