Presidenti i Republikës, Bajram Begaj, ka shprehur ngushëllimet e tij për ndarjen nga jeta të aktores së njohur Margarita Xhepa. Në një mesazh drejtuar familjes së saj dhe komunitetit artistik, ai vlerësoi figurën e saj si artiste, si grua dhe si nënë, duke theksuar kontributin e saj të jashtëzakonshëm në art dhe shoqëri.
“Me interpretimet e saj, ku spikati në mishërimin e figurës së gruas dhe veçanërisht të nënës, Margarita Xhepa çoi dritë dhe u bë pjesë e dashur e familjeve shqiptare,” shkroi Presidenti Begaj në rrjetet sociale.
Kryeministri Edi Rama ka qenë fjalëpak në përkujtimoren e tij duke shkruar thjesht: lamtumirë yll! në një postim përbri fotove nga rolet më ikonike të Xhepës.
Edhe Ministri i Shtetit për Marrëdhëniet me Parlamentin, Taulant Balla, shprehu dhimbjen e tij për këtë humbje, duke kujtuar se vetëm një ditë më parë e kishte uruar aktoren për 91-vjetorin e lindjes. “Një lajm shumë i hidhur për artin shqiptar dhe për të gjithë ata që kanë ndjekur dhe duartrokitur artin e saj,” tha Balla.
Nga burgu edhe Kryetari i Bashkisë së Tiranës, Erion Veliaj, vlerësoi Xhepën si një ikonë të skenës dhe ekranit, duke theksuar se roli i saj në kulturën shqiptare mbetet i pavdekshëm. “Ajo la pas një trashëgimi të jashtëzakonshme dhe do të na mungojë të gjithëve,” shkroi Veliaj.
Ndërsa kreu i PD Sali Berisha mbajti një minutë heshtje për Margarita Xhepën në fillim të konferencës për shtyp sot ku do të prezantonte programin per kulturën.
“Dua të shpreh ngushëllimet e mia për të ndjera familjes Xhepa, miqve, bashkëpunëtorëve dhe të gjithë artdashësve të Shqipërisë, pasi sot u nda nga jeta artistja më përfaqësuese e skenës shqiptare në disa dekada, Margarita Xhepa.
Margarita Xhepa është një artistë e papërsëritshme që shndriti në dhjetëra dhe qindra role në skenën e teatrit dhe në film.
Me një talent të rrallë.
Me një forcë interpretimi të jashtëzakonshëm.”
Margarita Xhepa, një nga emrat më të mëdhenj të teatrit dhe kinematografisë shqiptare, u nda nga jeta në moshën 91-vjeçare, duke lënë pas një trashëgimi artistike të pasur që do të kujtohet brez pas brezi.
Margarita Xhepa do të përcillet në banesën e fundit nesër (4 prill), ndërkohë homazhet do të mbahen në orën 10:00-13:00 në hollin e Teatrit Kombëtar të Operas dhe Baletit.
