Prokuroria e Posaçme ka goditur një nga grupet më të mëdha kriminale të trafikut ndërkombëtar të drogës dhe pastrimit të parave, i akuzuar për trafikimin e të paktën 50 tonëve kokainë nga Amerika Latine drejt Europës gjatë viteve 2019-2021.
Sipas SPAK, grupi kriminal operonte në Amerikën Latine, Brazil, Belgjikë dhe Holandë. Hetimet kanë dokumentuar pesë episode kryesore trafiku, ku janë sekuestruar në total 8.96 ton kokainë.
Mes personave të akuzuar janë Dritan Gjika, Isa Aliu, Nikoll Bibaj, Sokol Bibaj, Florjan Musaj, Armando Pacani, Denis Matoshi alias Eldi Dizdari, Naldi Yzeiraj, Oklid Aliu dhe Shpëtim Aliu. Deri tani është arrestuar vetëm Florjan Musaj, ndërsa pjesa tjetër janë shpallur në kërkim.
Sipas hetimeve, një pjesë e fitimeve nga trafiku i kokainës është futur në Shqipëri jashtë sistemit bankar dhe është investuar në sektorë si ndërtimi, hoteleria, pasuritë e paluajtshme dhe kompani tregtare.
Në kuadër të operacionit janë sekuestruar pasuri me vlerë rreth 150 milionë euro, përfshirë kompani, komplekse turistike, hotele dhe projekte ndërtimi në Tiranë, Gjirin e Lalzit, Jalë dhe Dhërmi.
Mes pasurive të vendosura nën sekuestro janë shoqëritë “Aliu Road House”, “Green Invest”, “Seaview Development”, “A.R.H Security”, “Altea Construction”, “Altea Invest”, “F&XH Invest”, si dhe pjesë të projekteve “Porto Lalzi”, “Lalzi Marina Seaside”, “Astoria Residence” dhe “Hotel Elisa Tirana”.
SPAK dyshon se këto investime janë financuar me të ardhura të krijuara nga trafiku ndërkombëtar i narkotikëve dhe pastrimi i parave.
Tags SEO: SPAK, Dritan Gjika, Isa Aliu, Armando Pacani, 50 ton kokainë, trafik droge, pastrim parash, 150 milionë euro, Porto Lalzi, Lalzi Marina, Hotel Elisa Tirana, Altea Construction, Green Invest, Florjan Musaj, kokainë nga Amerika Latine, krimi i organizuar.
