Tensionet mes SHBA-së dhe Iranit janë rritur ndjeshëm, duke vënë në pikëpyetje vazhdimin e negociatave dhe vetë armëpushimin që pritet të skadojë në ditët në vijim.
Teherani ka deklaruar se aktualisht nuk ka plane për një raund të ri bisedimesh, duke e lidhur këtë qëndrim me bllokadën detare amerikane në Ngushticën e Hormuzit. Situata u përshkallëzua pas ndërhyrjes së forcave amerikane, të cilat sekuestruan një anije iraniane, veprim që Irani e cilëson si shkelje të armëpushimit.
Ndërkohë, SHBA ka konfirmuar se ka ndaluar ose kthyer pas dhjetëra anije që lundronin drejt ose nga brigjet iraniane, në përpjekje për të kufizuar eksportet e naftës së Teheranit.
Nga ana tjetër, presidenti iranian Masoud Pezeshkian ka deklaruar se vendi i tij “nuk i nënshtrohet forcës”, duke theksuar mungesën e besimit ndaj SHBA-së dhe duke paralajmëruar se çdo dialog duhet të bazohet në respektimin e angazhimeve.
Në këtë klimë të tensionuar, një delegacion amerikan i drejtuar nga zëvendëspresidenti JD Vance pritet të udhëtojë drejt Pakistanit për bisedime, por ende nuk ka një konfirmim nëse pala iraniane do të marrë pjesë.
Paralelisht, situata mbetet e brishtë edhe në Lindjen e Mesme, ku armëpushimi mes Izraelit dhe Libanit vazhdon të jetë i paqëndrueshëm, me raportime për sulme të reja dhe shkelje të marrëveshjes.
Ekspertët paralajmërojnë se nëse negociatat dështojnë dhe tensionet në Hormuz përshkallëzohen, rreziku për një konflikt më të gjerë në rajon mbetet i lartë.
