Stresi tek macet nuk është thjesht një problem sjelljeje, por një rrezik real për jetën e tyre. Sipas specialistëve të veterinarisë, ai mund të dobësojë sistemin imunitar dhe të dëmtojë organet jetësore, duke çuar në sëmundje serioze.
Ndryshe nga qentë, macet nuk e shfaqin lehtë stresin, por e fshehin atë, çka e bën më të vështirë për pronarët të dallojnë problemin në kohë. Shenjat janë shpesh të vogla: ndryshime në oreks, sjellje të pazakonta me pastrimin e trupit apo përdorimin e kutisë së rërës.
Një nga pasojat më të zakonshme është cistiti idiopatik, një sëmundje e lidhur drejtpërdrejt me stresin, e cila në raste të rënda mund të bëhet kërcënuese për jetën. Ekspertët paralajmërojnë se një mace që ndalon urinimin apo ushqimin për më shumë se 24 orë ka nevojë urgjente për ndërhyrje mjekësore.
Stresi kronik lidhet shpesh me ndryshime në ambientin e përditshëm, si lëvizja e mobiljeve, ndryshimi i rutinës apo prezenca e kafshëve të reja. Për macet, stabiliteti dhe rutina janë thelbësore për mirëqenien.
Specialistët këshillojnë që pronarët të krijojnë një ambient të qetë dhe të parashikueshëm, me hapësira të sigurta, lodra dhe kujdes të vazhdueshëm, për të shmangur pasojat që mund të jenë fatale.
