Prokuroria e Podgoricës ka nisur hetimet pas deklaratave të guvernatores së Bankës Qendrore të Malit të Zi, Irena Radović, e cila ka denoncuar presione për vendimmarrjen në sektorin bankar, përfshirë licencimin e bankave dhe anulimin e gjobave shumëmilionëshe të vendosura për shkelje të rregullave kundër pastrimit të parave.

Sipas gazetës malazeze Vijesti, Prokuroria Themelore e Podgoricës ka hapur një dosje dhe po kryen verifikime për të përcaktuar nëse pas pretendimeve të guvernatores fshihen veprime të paligjshme.

Hetimet kanë nisur edhe pse Radović nuk ka paraqitur një kallëzim zyrtar ndaj personave që, sipas saj, kanë ushtruar presion.

Presione për licencat bankare dhe gjobat milionëshe

Më 6 nëntor, gjatë një seance në Komisionin Parlamentar për Ekonominë, Financat dhe Buxhetin, guvernatorja deklaroi se kishte pasur përpjekje për të ndikuar në përzgjedhjen e zëvendësguvernatorëve të Bankës Qendrore.

Sipas saj, këto përpjekje lidheshin me kërkesa për licencimin e bankave të caktuara dhe tërheqjen e gjobave shumëmilionëshe, të vendosura për shkelje të legjislacionit kundër pastrimit të parave.

Radović theksoi se presionet nuk kishin ardhur nga qarqet politike, por përmes ndërmjetësve dhe individëve të ndryshëm.

Ajo pretendoi gjithashtu se institucionet përgjegjëse të sigurisë ishin informuar disa herë dhe se u ishin dorëzuar të dhëna për identitetin e personave të përfshirë.

Në vëmendje edhe grupi bankar Alta

Çështja ka ngritur pikëpyetje edhe për përpjekjet e grupit Alta për të marrë kontrollin e Addiko Bank.

Sipas Vijesti, Prokuroria nuk ka sqaruar nëse po verifikon një lidhje të mundshme mes presioneve të denoncuara dhe biznesmenit Davor Macura apo grupit Alta.

Autoritetet malazeze të sigurisë kanë vendosur më herët ndalimin e hyrjes së Macurës në Mal të Zi, pas një hetimi shumëvjeçar.

Megjithatë, deri tani nuk është konfirmuar se ai apo përfaqësues të grupit Alta kanë ushtruar presion ndaj guvernatores.

Policia dhe shërbimet sekrete japin sqarime të ndryshme

Policia malazeze ka deklaruar se Radović nuk kishte paraqitur kallëzime zyrtare për presione në lidhje me detyrën e saj.

Nga ana tjetër, Agjencia e Sigurisë Kombëtare e Malit të Zi (ANB) konfirmoi se gjatë një takimi më 30 tetor, guvernatorja kishte dhënë verbalisht informacione për disa persona që, sipas saj, kishin ushtruar presion në çështje të sektorit bankar.

Takimi ishte zhvilluar pas vendimit për ndalimin e hyrjes së biznesmenit Davor Macura në Mal të Zi.

Agjencia nuk ka bërë publikë emrat e personave të përmendur nga guvernatorja dhe as nëse pretendimet lidhen me grupin Alta.

Prokuroria: Po verifikojmë të gjitha rrethanat

Prokuroria Themelore e Podgoricës konfirmoi për Vijesti se çështja është në fazën e verifikimeve paraprake.

Institucioni bëri të ditur se prokurorja përgjegjëse po ndërmerr veprimet e parashikuara nga ligji për të sqaruar faktet, por nuk dha hollësi të tjera për të mos cenuar hetimin.

Ndërkohë, guvernatorja Radović nuk u është përgjigjur pyetjeve të gazetës lidhur me identitetin e personave që pretendohet se kanë ushtruar presion, kërkesat konkrete dhe kohën kur kanë ndodhur kontaktet.

Hetimi pritet të sqarojë nëse ka pasur ndërhyrje të paligjshme në vendimmarrjen e Bankës Qendrore të Malit të Zi dhe në proceset që lidhen me mbikëqyrjen e sistemit bankar.