Sulmet e vazhdueshme me dronë nga Ukraina ndaj infrastrukturës së naftës në Rusi po shkaktojnë pasoja të rënda mjedisore, me raportime për një fenomen të pazakontë dhe të rrezikshëm: “shi i zi” toksik që po bie në disa zona pranë Detit të Zi.
Sipas raportimeve ndërkombëtare, një rafineri kyçe në qytetin Tuapse është goditur katër herë brenda dy javësh, duke shkaktuar një zjarr të fuqishëm që ka zgjatur për ditë të tëra dhe ka çliruar substanca kancerogjene në ajër.
Banorët e zonës ankohen për ndotje të rëndë dhe mungesë transparence nga autoritetet, duke akuzuar qeverinë për minimizim apo fshehje të përmasave të katastrofës.
Pamjet nga terreni tregojnë ndotje të ujërave me produkte nafte dhe përhapje të substancave të rrezikshme në mjedis, ndërsa ekspertët paralajmërojnë se kjo mund të jetë një nga krizat më të rënda ekologjike në Rusi që nga rënia e Bashkimit Sovjetik.
Situata vjen në një moment kur lufta në Ukrainë po intensifikohet edhe në frontin ekonomik dhe energjetik, me goditje të drejtpërdrejta ndaj burimeve të naftës, duke rritur jo vetëm tensionet ushtarake, por edhe rreziqet për shëndetin publik dhe mjedisin.
