Audiopërgjime të reja të publikuara në “Çim Peka LIVE” kanë rikthyer në qendër të debatit emrin e biznesmenit Roni Yeffet dhe lidhjet që ai pretendon se ka me institucionet shqiptare.
Në një prej bisedave të publikuara, Yeffet dëgjohet duke u kërkuar bashkëbiseduesve të tij të mos dërgojnë asnjë shkresë zyrtare në Ministrinë e Energjetikës për çështjen e gazit në Vlorë.
“Mos dërgoni asnjë letër. Më pas do të merrem unë me ta”, dëgjohet të thotë Yeffet, ndërsa në një moment tjetër shton: “Mbështetuni te unë për Ministrinë e Energjetikës”.
Në të njëjtën bisedë, ai udhëzon bashkëbiseduesit që gjatë vizitës në Vlorë të paraqiten si përfaqësues të një kompanie amerikane dhe u thotë se institucionet do të bashkëpunojnë me ta.
Publikimi i audiove ka ngritur pikëpyetje mbi mënyrën se si Yeffet pretendonte se mund të komunikonte me administratën shqiptare dhe mbi interesat e tij në sektorin e energjisë.
Gazetari Artan Hoxha shkoi më tej, duke pretenduar se ndërhyrjet e institucioneve ndaj kompanisë “Delvina Gas” kishin lidhje me interesa për marrjen nën kontroll të një aseti strategjik gazmbajtës.
Sipas Hoxhës, ish-ministrja Belinda Balluku kishte shkuar personalisht në ambientet e kompanisë së bashku me përfaqësues të disa institucioneve shtetërore. Ai pretendoi gjithashtu se pas presionit ndaj kompanisë qëndronin interesa të personave të lidhur me Yeffet.
Këto pretendime nuk janë konfirmuar nga institucionet përkatëse.
Pas publikimit të përgjimeve reagoi edhe kreu i grupit parlamentar të PD-së, Gazment Bardhi, i cili kërkoi “transparencë, hetim dhe përgjegjësi menjëherë”.
Sipas Bardhit, audiot ngrenë pyetjen nëse procedurat zyrtare po anashkalohen përmes lidhjeve personale me drejtues të qeverisë.
Përgjimet e reja i shtohen debatit të nisur më herët për aktivitetin e Yeffet në Shqipëri, partneritetet e tij në sektorin e mbrojtjes dhe pretendimet e bëra në biseda të tjera të publikuara gjatë ditëve të fundit.
