Ministria e Mjedisit ka përgënjeshtruar informacionet se më 15 gusht ka nisur sezoni i gjuetisë në Shqipëri, duke sqaruar se aktualisht ushtrimi i këtij aktiviteti nuk lejohet.
Sipas ministrisë, Ligji nr. 89/2025 “Për gjuetinë” përcakton se zonat ku mund të ushtrohet gjuetia duhet të miratohen me vendim të Këshillit të Ministrave. Deri në miratimin e tyre sipas procedurave ligjore, gjuetia në territorin e Republikës së Shqipërisë mbetet e ndaluar.
Ministria thekson se as kalendari i gjuetisë dhe as dispozitat kalimtare të ligjit nuk mund të konsiderohen si autorizim për nisjen e aktivitetit, për sa kohë nuk janë miratuar zonat përkatëse.
Autoritetet u bëjnë thirrje gjuetarëve dhe shoqatave të gjuetisë që t’u referohen vetëm akteve dhe njoftimeve zyrtare, ndërsa paralajmërojnë kontrolle dhe penalitete për çdo rast të ushtrimit të paligjshëm të gjuetisë.
