Cristiano Ronaldo është larguar nga grumbullimi i kombëtares së Portugalisë në Danimarkë pasi trajneri Jorge Jesus bëri të ditur se kapiteni nuk do të ishte titullar as në ndeshjen e radhës kundër Danimarkës.
Ronaldo kishte mbërritur me autobusin e skuadrës në stadiumin “Parken” të Kopenhagës ku Portugalia do të zhvillonte stërvitjen. Por menjëherë pas konferencës për shtyp të Jesus ai u largua nga stadiumi i shoqëruar nga dy pjesëtarë të stafit dhe nuk doli në fushë me skuadrën.
Pak më vonë 41-vjeçari konfirmoi vendimin në Instagram.
“Pas konferencës për shtyp të trajnerit të kombëtares dhe pas një bisede me presidentin e Federatës Portugeze të Futbollit vendosa të largohem nga grumbullimi. Në kohën e duhur do t’i tregoj të gjithë popullit portugez të vërtetën për arsyet që më çuan në këtë vendim”, shkroi Ronaldo.
Përplasja vjen pas ndeshjes me Norvegjinë të fituar 2-1 nga Portugalia. Ronaldo qëndroi gjatë gjithë takimit në stol edhe pse ishte dërguar për nxehje. Pas përfundimit të ndeshjes ai shkoi direkt në dhomat e zhveshjes pa iu bashkuar shokëve të skuadrës për të përshëndetur tifozët.
Jorge Jesus mohoi se mes tyre kishte pasur incident. Ai pranoi megjithatë se Ronaldo ishte zhgënjyer që nuk ishte aktivizuar.
Trajneri bëri të ditur gjithashtu se kundër Danimarkës synonte të aktivizonte përsëri nga minuta e parë Gonçalo Ramos.
“Nëse gjithçka shkon sipas planit do të luajë Gonçalo. Nëse do të kem nevojë për Ronaldon do të hyjë. Nëse nuk do të kem nevojë nuk do të hyjë”, deklaroi Jesus përpara largimit të kapitenit.
Federata Portugeze konfirmoi më pas zyrtarisht se Ronaldo kishte lënë grumbullimin. Përgatitjet për ndeshjet kundër Danimarkës dhe Norvegjisë do të vazhdojnë me 24 futbollistët e mbetur.
Ngjarja ka shkaktuar reagime të shumta në Portugali. Motra e Ronaldos Elma Aveiro reagoi ashpër duke kritikuar mënyrën se si po trajtohet vëllai i saj.
Ronaldo është rekordmeni absolut i Portugalisë me 234 ndeshje dhe 146 gola. Ai ka deklaruar gjatë verës se ky sezon “ndoshta” do të jetë i fundit i karrierës së tij.
