Partia Demokratike ka kallëzuar në SPAK ministren e Shëndetësisë, Klodiana Spahiu, duke e akuzuar për plagjiaturë në punimin e saj akademik.
Kallëzimi u bë publik nga avokatja Adriana Kalaja, e cila deklaroi para SPAK se, sipas pretendimeve të PD-së, bëhet fjalë për një plagjiaturë të plotë.
“Jo vetëm që ka marrë në plagjiaturë të plotë temën e diplomës. Edhe presjet, edhe qëllimi, shkaku është i njëjtë nga vendi ku është bërë kopjimi”, deklaroi Kalaja.
Ajo pretendoi se çështja nuk ka vetëm karakter akademik, por edhe pasoja financiare, duke argumentuar se personat që kanë përfituar të ardhura për shkak të titujve shkencorë të marrë në mënyrë të parregullt duhet t’i kthejnë ato.
PD paralajmëroi se kallëzimi ndaj ministres së Shëndetësisë nuk do të jetë i vetmi. Kalaja deklaroi se në fokus do të jenë ministra, deputetë dhe zyrtarë të tjerë.
Kalaja iu rikthye edhe çështjes së zëvendëskryeministres Belinda Balluku, duke thënë se PD ka bërë më parë kallëzim dhe se ende nuk ka marrë përgjigje lidhur me pretendimet e saj për diplomën e shkollës së lartë.
Pretendimet e ngritura nga PD dhe Kalaja janë akuza të palës kallëzuese dhe në materialin e publikuar nuk paraqitet një qëndrim i ministres Klodiana Spahiu apo një konkluzion i SPAK që t’i ketë verifikuar ato.
