Momente tensioni janë regjistruar këtë të shtunë në Vlorë, gjatë protestës kundër ndërtimit të Muzeut Hebraik në zonën historike të qytetit.
Protestuesit tentuan të futeshin në kantier, por u ndaluan nga forcat e policisë. Ata kërkojnë pezullimin e punimeve, duke pretenduar se projekti prek godinën e Klubit Patriotik “Labëria”, të lidhur me historinë e Pavarësisë dhe figurën e Ismail Qemalit.
Qytetarët theksuan se nuk kundërshtojnë ngritjen e Muzeut Hebraik, por vendndodhjen e zgjedhur, duke kërkuar që godina aktuale t’i kushtohet historisë kombëtare.
Pas protestës reagoi kryeministri Edi Rama, i cili akuzoi deputetin demokrat Bujar Leskaj dhe pjesëmarrësit se po përhapin pretendime të pavërteta për shkatërrimin e Muzeut “Labëria”.
Rama i cilësoi protestuesit “një grup delenxhinjsh” dhe përdori tone të ashpra ndaj Leskajt, duke shkruar se “çeta e Lesko pijanikut” e ka zakon të sulmojë kantieret e transformimit të Vlorës.
Kryeministri deklaroi se, me kërkesën e tij, Fondi Shqiptaro-Amerikan i Zhvillimit ka akorduar 200 mijë dollarë për projektin e restaurimit dhe transformimit të Muzeut “Labëria”. Sipas tij, godina e degraduar do të kthehet, së bashku me Muzeun Hebraik, në një tjetër pikë të rëndësishme historike dhe turistike të Vlorës.
