Autoritetet e Maqedonisë së Veriut kanë ndaluar importimin e më shumë se 27,5 tonëve qumësht UHT nga Kosova, pasi analizat laboratorike kanë zbuluar prani të aflatoksinës mbi kufijtë e lejuar.
Sipas Agjencisë së Ushqimit dhe Veterinarisë, bëhet fjalë për dy ngarkesa me peshë të përgjithshme prej 27.520 kilogramësh, të cilat u bllokuan në pikën kufitare të Bllacës.
Qumështi kishte si destinacion një zinxhir marketesh në Maqedoninë e Veriut. Pas rezultateve të analizave, autoritetet konstatuan se produkti nuk përmbushte kushtet e sigurisë ushqimore dhe nuk lejuan hedhjen e tij në treg.
E gjithë sasia e bllokuar është asgjësuar në deponinë “Drislla”, nën mbikëqyrjen e një veterineri zyrtar.
Mostrat e qumështit janë marrë në kuadër të Programit të Monitorimit për ngarkesat me ushqime me origjinë shtazore që importohen në Maqedoninë e Veriut.
Aflatoksinat janë substanca toksike të prodhuara nga disa lloje myku, të cilat mund të ndotin ushqimet dhe ushqimin e kafshëve. Nëse kafshët konsumojnë ushqim të kontaminuar, një formë e aflatoksinës mund të kalojë edhe në qumësht.
Ekspozimi i zgjatur ndaj sasive të larta të aflatoksinës mund të përbëjë rrezik për shëndetin, veçanërisht për mëlçinë. Për këtë arsye, prania e saj në qumësht dhe produkte ushqimore kontrollohet përmes kufijve të përcaktuar ligjorë dhe analizave laboratorike.
Agjencia e Ushqimit dhe Veterinarisë kishte miratuar më 17 korrik masa të posaçme sigurie për importin e qumështit dhe produkteve të tij. Masat përfshijnë qumështin e lëngshëm, qumështin e kondensuar, qumështin pluhur dhe produktet që i përmbajnë ato.
Nëpërmjet vendimit janë forcuar kontrollet kufitare dhe testimet e detyrueshme laboratorike për ngarkesat e importuara.
Agjencia deklaroi se synimi i masave është të garantohet që në tregun vendas të hyjnë vetëm produkte të sigurta dhe cilësore, të mbrohen konsumatorët dhe të sigurohen kushte të drejta për prodhuesit vendas.
Nuk janë bërë publike kompania eksportuese nga Kosova, marka e qumështit dhe zinxhiri i marketeve ku ishte planifikuar shitja e produktit.
