Shtetet e Bashkuara shtojnë presionin ndaj politikës në Kosovë për t’i dhënë fund krizës institucionale. Departamenti i Shtetit kërkon nga udhëheqësit politikë të bashkëpunojnë dhe të formojnë institucionet në përputhje me Kushtetutën dhe vendimet e Gjykatës Kushtetuese.
“Ngërçi i vazhdueshëm politik po rezulton në mundësi të humbura për Kosovën”, deklaroi një zëdhënës i DASH, duke kërkuar që prioritet të jenë progresi dhe stabiliteti.
Thirrja amerikane vjen ndërsa PDK-ja dhe Aleanca kanë intensifikuar aksionet kundër bllokimit të Kuvendit. Për të gjashtën ditë radhazi, deputetë të opozitës protestuan para Qeverisë, ndërsa më pas u mblodhën në sallën plenare dhe kërkuan vazhdimin e seancës konstituive.
PDK-ja vendosi në tavolinat e deputetëve të Vetëvendosjes letra me thirrjen për respektimin e Kushtetutës dhe konstituimin e Kuvendit. Opozita kërkon që seanca të thirret çdo 48 orë deri në përfundimin e procesit.
Ndërkohë, deputetja e Aleancës, Time Kadrijaj, paralajmëroi se nëse bllokada vazhdon, aksionet opozitare mund të shndërrohen në protesta masive.
Kriza vazhdon që prej ndërprerjes së procesit për zgjedhjen e kryetarit të Kuvendit, ndërsa edhe Bashkimi Evropian ka kërkuar zgjidhje të shpejtë, duke paralajmëruar se vonesat mund të ndikojnë në reformat dhe mbështetjen financiare për Kosovën.
