Kimberley Ho la pas karrierën në Wall Street për të hyrë në një treg që, sipas saj, industria e bukurisë e kishte neglizhuar: produktet e kujdesit për lëkurën e fëmijëve dhe familjeve. Sot marka e saj Evereden gjeneron rreth 100 milionë dollarë shitje në vit dhe është kthyer në fenomen mes fëmijëve dhe adoleshentëve të Generation Alpha.
Ho, e përzgjedhur më parë në “Forbes 30 Under 30”, themeloi Evereden në vitin 2018 së bashku me bashkëshortin Huang Lee, ish-punonjës i Goldman Sachs. Fillimisht kompania u fokusua te produktet për bebe me lëkurë të ndjeshme dhe te nënat që kërkonin alternativa të përshtatshme për familjen.
Por klientët e parë u rritën dhe bashkë me ta u zgjerua edhe Evereden. Sot kompania prodhon produkte për kujdesin e fytyrës dhe flokëve, serume, balsamë, parfume dhe produkte kozmetike të konceptuara posaçërisht për fëmijët, paraadoleshentët dhe gratë shtatzëna.
Strategjia rezultoi tepër fitimprurëse. Sipas Forbes, Evereden siguron rreth 100 milionë dollarë të ardhura vjetore nga shitjet. Kompania kishte mbledhur gjithashtu rreth 40 milionë dollarë financime nga investitorët mes viteve 2018 dhe 2021.
Marka shitet në Sephora në disa vende jashtë SHBA-së, mes tyre Kanadaja, Australia dhe Filipinet, megjithëse pjesa më e madhe e të ardhurave vjen nga shitjet direkte online.
Ho thotë se ndërsa miliarda dollarë janë investuar në kozmetikën dhe produktet e bukurisë për gratë, kujdesi për lëkurën e gjithë familjes kishte marrë shumë më pak vëmendje. Pikërisht në këtë boshllëk tregu Evereden ndërtoi biznesin e saj.
Nga produktet për lëkurën e ndjeshme të bebeve te serumet dhe parfumet për Generation Alpha, kompania është rritur së bashku me klientët e saj, duke e kthyer një ide të nisur në vitin 2018 në një biznes me shitje 100 milionë dollarë në vit./ Forbes
