Më 22 gusht përfundon afati gjashtëmujor i hetimit ndaj ish-zëvendëskryeministrit të Maqedonisë së Veriut, Artan Grubi. Nëse deri në atë datë Prokuroria nuk ngre aktakuzë, masa e arrestit shtëpiak ndaj tij do të pushojë së vlejturi, sipas afateve të parashikuara në ligj.
Sipas mediave në Shkup, prokurori i çështjes ka edhe 17 ditë kohë për të përfunduar hetimin. Në rast se nuk paraqitet aktakuzë, Gjykata Penale pritet të vendosë një masë tjetër sigurie, që zakonisht është konfiskimi i dokumentit të udhëtimit.
Artan Grubi u dorëzua në pikën kufitare Bllacë më 23 shkurt të këtij viti, pas rreth 14 muajsh jashtë vendit. Ai dyshohet për përfshirje në çështjen e Lotarisë Shtetërore, ku hetimet lidhen me një dëm të dyshuar financiar prej 8.2 milionë eurosh.
Në të njëjtin hetim është i dyshuar edhe ish-drejtori i Lotarisë Shtetërore, Përparim Bajrami, i cili vijon të jetë në kërkim, si edhe katër persona të tjerë të dyshuar për shpërdorim detyre në procedurat për organizimin e lojërave elektronike dhe online të fatit.
Prokuroria Publike nuk ka bërë të ditur nëse aktakuza do të ngrihet përpara skadimit të afatit ligjor.
