Fermerët në Kosovë kanë protestuar duke derdhur qumështin në një lumë, pas mbylljes së qumështores “Vita” dhe vonesave në publikimin e rezultateve të analizave nga Agjencia e Ushqimit dhe Veterinarisë (AUV).
Mes protestuesve ishte edhe veterani i UÇK-së, Tafë Çeku, i cili e cilësoi veprimin si një sakrificë të dhimbshme.
“Po më duket sikur po derdh gjakun”, u shpreh ai, teksa hodhi qumështin në lumë, duke theksuar se produkti është tërësisht vendas dhe i sigurt për konsum.
Çeku kundërshtoi zërat që pretendojnë se qumështi përmban pluhur ose vaj palme, duke deklaruar se ai është “100 për qind qumësht i Kosovës” dhe i prodhuar sipas standardeve.
Fermerët kërkojnë që autoritetet të publikojnë sa më shpejt rezultatet laboratorike dhe të sqarojnë situatën, ndërsa paralajmërojnë se në të kundërt protestat mund të përshkallëzohen.
