Kryeministri Edi Rama ka reaguar sërish për debatin rreth Banjave Termale të Bënjës, duke publikuar një video nga zona ku shihen turistë dhe aktivitete festive nën ritmet e muzikës popullore.
Në një postim në rrjetet sociale, Rama ironizoi kritikët që, sipas tij, përhapën dezinformim dhe montazhe për gjendjen e llixhave, duke i cilësuar si “flamingot me qeleshe të bulevardit”.
“Nga Banjat ‘e shkretuara’ Termale të Bënjës, Përmet, ku me shumë dizinformim e montazhe provokuese të shpërndara nëpër kanalet sociale 48 orë rresht nga flamingot me qeleshe të bulevardit dhe me fryrjen e pandalur të algoritmit të urrejtjes, u tentua të krijohej një vatër e re nxitjeje… Por kësaj radhe fitoi e vërteta”, shkroi Rama.
Ky është reagimi i tretë i kryeministrit lidhur me polemikat për Banjat e Bënjës, pas publikimit të pamjeve dhe ankesave të disa vizitorëve se vaskat termale ishin bosh gjatë sezonit turistik.
Nga ana tjetër, përfaqësues të Partisë Socialiste kanë sqaruar se investimi për rikualifikimin e kompleksit nuk ka përfunduar ende dhe se ndërhyrjet synojnë përmirësimin e infrastrukturës dhe kushteve për vizitorët.
Banjat Termale të Bënjës, rreth 13 kilometra larg qytetit të Përmetit, janë një nga destinacionet më të frekuentuara turistike në jug të vendit. Projekti i rikualifikimit përfshin ndërtimin e rrugëve të reja të aksesit, hapësirave rekreative dhe ambienteve të reja të shërbimit, me synimin për ta kthyer zonën në një qendër të rëndësishme të turizmit natyror dhe kulturor.
