Një nga surprizat më të mëdha të Kupës së Botës 2026 u regjistrua në grupin E, ku Ekuadori mposhti 2-1 Gjermaninë dhe siguroi një kualifikim historik në fazën me eliminim direkt si një nga ekipet më të mira të vendeve të treta.
Gjermania kaloi në avantazh që në minutën e dytë me Leroy Sané, por Ekuadori reagoi menjëherë dhe barazoi në minutën e 9-të me Nilson Angulo. Goli i fitores u shënua në minutën e 77-të nga Gonzalo Plata, duke ndezur festën e tifozëve ekuadorianë.
Me këtë sukses, Ekuadori siguroi katër pikë dhe kaloi në fazën tjetër të turneut, ndërsa Gjermania, e cila e kishte siguruar më herët kualifikimin, e mbylli fazën e grupeve me humbjen e parë pas një serie prej 11 fitoresh radhazi në të gjitha kompeticionet.
Trajneri i Ekuadorit, Sebastián Beccacece, ia dedikoi suksesin tifozëve.
“Rëndësia e këtij rezultati nuk është për mua, por për popullin. Futbollistët i kanë dhënë një gëzim të madh vendit tonë. Tani duhet ta shijojmë dhe ta festojmë”, deklaroi ai pas ndeshjes.
Ky konsiderohet si një nga momentet më të rëndësishme në historinë e futbollit ekuadorian, ndërsa në fazën e 1/16-ve Ekuadori mund të përballet me Anglinë, në varësi të rezultateve të grupeve të tjera.
