Elon Musk është bërë personi i parë në histori që arrin statusin e trilionerit, pasi aksionet e SpaceX u hodhën me sukses në bursën Nasdaq dhe u rritën ndjeshëm që në ditën e parë të tregtimit.
Aksionet e kompanisë hapësinore nisën tregtimin me 150 dollarë për aksion, mbi çmimin fillestar prej 135 dollarësh, ndërsa gjatë ditës arritën deri në 176 dollarë. Në mbyllje të bursës, aksioni u stabilizua në 160.95 dollarë, rreth 19% më lart se vlerësimi fillestar.
Rritja e vlerës së SpaceX e çoi pasurinë neto të Musk mbi 1 trilion dollarë, sipas llogaritjeve të Bloomberg, duke e bërë atë trilionerin e parë në botë.
Megjithatë, ekspertët theksojnë se kjo nuk do të thotë se Musk ka 1 trilion dollarë cash. Pjesa dërrmuese e pasurisë së tij lidhet me aksionet që zotëron në SpaceX dhe Tesla, vlera e të cilave ndryshon sipas tregut.
Oferta publike e SpaceX është më e madhja që nga debutimi i gjigantit saudit Saudi Aramco në vitin 2019 dhe ka kthyer mijëra punonjës aktualë dhe ish-punonjës të kompanisë në milionerë.
Kompania vazhdon të investojë në raketa, internetin satelitor Starlink, inteligjencën artificiale përmes xAI dhe projektet afatgjata për eksplorimin e Hënës dhe Marsit.
Suksesi i debutimit në bursë ka nxitur debate edhe për pabarazinë ekonomike globale. Organizata Oxfam deklaroi se pasuria e Musk tashmë tejkalon atë të miliarda njerëzve më të varfër në botë së bashku, duke kërkuar taksim më të lartë për super të pasurit.
Pavarësisht entuziazmit të investitorëve, analistët paralajmërojnë se prova e vërtetë për SpaceX do të jetë aftësia për të ruajtur vlerën e saj në muajt dhe vitet e ardhshme.
