Teoritë se Shakira mund të jetë zëvendësuar nga një dublante gjatë ceremonisë hapëse të Kupës së Botës 2026 janë përhapur me shpejtësi në rrjetet sociale, por deri tani nuk ekziston asnjë provë që mbështet këtë pretendim.
Këngëtarja kolumbiane ishte një nga yjet kryesore të spektaklit të zhvilluar në stadiumin Azteca të Mexico City, ku interpretoi këngën zyrtare të turneut “Dai Dai” së bashku me Burna Boy. Prania e saj ishte njoftuar paraprakisht nga FIFA dhe interpretimi u transmetua në mbarë botën.
Associated Press, The Guardian dhe media të tjera ndërkombëtare raportuan nga ceremonia duke identifikuar Shakirën si protagoniste të performancës, ndërsa fotografitë dhe videot e publikuara nga eventi tregojnë artisten në skenë gjatë interpretimit të himnit të Botërorit.
Dyshimet nisën pasi një pjesë e fansave komentuan pamjen e saj, veçanërisht përdorimin e syzeve të errëta dhe stilin skenik, duke ngritur teori se në skenë mund të kishte qenë një person tjetër. Megjithatë, as FIFA, as organizatorët dhe as mediat që mbuluan aktivitetin nuk kanë raportuar ndonjë indicie për përdorimin e një dublanteje.
Përkundrazi, interpretimi i saj është regjistruar si paraqitja e katërt e Shakirës në një Botëror, duke forcuar lidhjen e artistes me eventin më të madh të futbollit në botë.
