Shqipëria ka marrë një tjetër sinjal pozitiv në procesin e integrimit europian, pasi në Bruksel është miratuar pa kundërshtime drafti i qëndrimit të përbashkët të Bashkimit Europian, i bazuar në raportin IBAR.
Sipas burimeve të Këshillit të Bashkimit Europian për A2 CNN, dokumenti është miratuar në nivelin e grupit të punës COELA, pa asnjë kundërshtim nga shtetet anëtare.
“Drafti i qëndrimit të përbashkët të përkohshëm të BE-së, bazuar në IBAR, sapo është miratuar në COELA pa asnjë kundërshtim të mëtejshëm nga shtetet anëtare”, thuhet në përgjigjen e Këshillit të BE-së.
Hapi i radhës pritet të jetë miratimi formal nga ambasadorët e vendeve anëtare në COREPER, i planifikuar për nesër pasdite, çka më pas do të hapë rrugën për konfirmimin zyrtar të Konferencës Ndërqeveritare Shqipëri-BE më 26 maj.
Në takimin e sotëm në Bruksel, vendet anëtare dhanë dritën jeshile për vijimin e procedurave që lidhen me raportin IBAR dhe nisjen e procesit për mbylljen e kapitujve të parë të negociatave.
Ky zhvillim konsiderohet një hap i rëndësishëm për avancimin e Shqipërisë në negociatat e anëtarësimit në Bashkimin Europian.
