Jorida Tabaku mbajti një fjalim kritik në Kuvend gjatë debatit për integrimin europian, duke deklaruar se Shqipëria nuk mund të bëhet pjesë e Bashkimit Europian vetëm përmes propagandës apo miratimit formal të ligjeve.
Sipas saj, integrimi europian është “testi i demokracisë”, ndërsa sfida më e madhe për vendin mbetet pandëshkueshmëria dhe kapja e shtetit.
“Një vend nuk bëhet europian duke hapur kapituj në letër. Një vend bëhet europian duke ndërtuar institucione që funksionojnë realisht,” deklaroi Tabaku nga foltorja e Kuvendit.
Deputetja demokrate tha se progresi nuk matet me numrin e ligjeve të miratuara apo “prezantimet në PowerPoint të qeverisë”, por me reforma reale dhe funksionimin e institucioneve.
Ajo renditi si shqetësime kryesore korrupsionin, mungesën e konkurrencës së lirë, presionin ndaj medias dhe kontrollin politik mbi ekonominë.
“Kemi krijuar një sistem ku shteti është i fortë përballë qytetarit dhe i dobët përballë pushtetit,” u shpreh Tabaku.
Sipas saj, tenderat, koncesionet, investimet strategjike dhe planifikimi urban janë kthyer në mjete kontrolli politik dhe ekonomik.
Tabaku deklaroi se “kapja e shtetit” nuk nis vetëm me kontrollin e gjykatave, por edhe kur kontrollohen ekonomia, administrata, media dhe procesi zgjedhor.
“Integrimi nuk është teknik. Integrimi është politik. Integrimi është moral. Është testi i demokracisë,” tha ajo.
Në fjalën e saj, deputetja e PD-së u shpreh se Shqipëria është vonë në proces për shkak të mungesës së drejtësisë dhe ndëshkueshmërisë.
“Problemi në Shqipëri nuk është mungesa e propagandës. Problemi është mungesa e drejtësisë dhe mungesa e ndëshkueshmërisë,” deklaroi Tabaku.
Ajo iu drejtua edhe ministrit Ferit Hoxha, duke kërkuar zgjerimin e ekipeve negociuese dhe më shumë transparencë për procesin e integrimit.
“Ky proces është për fermerët, për bizneset që po mbyllen, për studentët që largohen dhe për shqiptarët që po braktisin vendin,” tha ajo.
