Superylli kolumbian Shakira ka dhënë një koncert madhështor falas në plazhin e famshëm Copacabana në Rio de Janeiro, duke mbledhur rreth 2 milionë spektatorë, sipas autoriteteve lokale.
Performanca u zhvillua në kuadër të turit të saj botëror “Las Mujeres Ya No Lloran” dhe është konsideruar një nga eventet më të mëdha muzikore të viteve të fundit në Brazil. Koncerti nisi me vonesë, por atmosfera u ndez menjëherë, me mijëra fansa që këndonin dhe kërcenin në bregdet.
Shakira interpretoi hitet e saj më të njohura si “Hips Don’t Lie”, “La Tortura” dhe “La Bicicleta”, duke e mbyllur spektaklin me një nga këngët e saj më të fundit. Gjatë koncertit, ajo ndau edhe mesazhe për forcën dhe qëndrueshmërinë e grave.
Kryebashkiaku i Rio de Janeiro e cilësoi eventin si historik, duke theksuar ndikimin e madh në turizëm dhe ekonomi. Sipas vlerësimeve, koncerti mund të gjenerojë mbi 150 milionë dollarë për ekonominë lokale, falë fluksit të vizitorëve dhe shpenzimeve në hotele, restorante dhe shërbime.
Koncerti i Shakirës vjen pas eventeve të ngjashme me Madonna dhe Lady Gaga në vitet e fundit, duke konfirmuar Copacabanën si një nga skenat më të mëdha të muzikës live në botë.
