Administrata amerikane ka vendosur rregulla të reja për aplikantët e vizave, duke kërkuar që ata të deklarojnë se nuk kanë frikë nga persekutimi në vendin e tyre të origjinës.
Sipas një udhëzimi të ri të Departamentit të Shtetit, të dërguar në ambasadat dhe konsullatat amerikane, çdo aplikant për vizë jo-emigruese – përfshirë turistët, studentët dhe punëtorët e përkohshëm – duhet të përgjigjet negativisht në dy pyetje kyçe: nëse ka përjetuar keqtrajtim dhe nëse ka frikë të kthehet në vendin e tij.
Nëse përgjigjja nuk është “jo” për të dyja pyetjet, procesi i dhënies së vizës nuk vijon më tej.
Ky ndryshim vjen në kuadër të politikave më të ashpra të emigracionit, me synimin për të penguar përdorimin e vizave si mënyrë për të kërkuar azil pas hyrjes në SHBA.
Autoritetet amerikane theksojnë se zyrtarët konsullorë janë linja e parë e mbrojtjes për sigurinë kombëtare dhe duhet të parandalojnë abuzimet me sistemin e emigracionit.
Megjithatë, ekspertët e emigracionit paralajmërojnë se masa mund të vendosë shumë persona në situata të vështira, duke i detyruar të zgjedhin mes sigurisë personale dhe mundësisë për të udhëtuar ligjërisht drejt Shteteve të Bashkuara./CNN
