Tensione dhe akuza të forta ndaj sistemit të drejtësisë janë artikuluar në një reagim publik, ku “Gjykata e Lanës” akuzohet për zvarritje të qëllimshme të procesit dhe pengim të rrugës drejt Gjykatës Europiane të të Drejtave të Njeriut në Strasburg.
Sipas deklaratës, çështja është shtyrë për rreth 6 muaj, përtej çdo afati të arsyeshëm, duke u cilësuar si një veprim i qëllimshëm për të vonuar procesin. Autori i reagimit shprehet se vendimi i fundit i gjykatës nuk përbën surprizë, ndërsa rikujton qëndrimin e tij kritik ndaj këtij institucioni që prej vitit 2020.
Në të njëjtën kohë, bëhet thirrje që të paktën të mos vonohet zbardhja e vendimit, duke kërkuar më shumë përgjegjësi dhe transparencë nga ana e gjykatës.
Reagimi shoqërohet edhe me një paralajmërim për zhvillimet e ardhshme: më 27 prill pritet të nisë seanca e parë e gjykimit në themel, ku autori deklaron se do të përballet “ballë për ballë” me palën tjetër, të cilën e akuzon për rrëmbim dhe manipulim të procesit.
Ai u bën thirrje mediave dhe gazetarëve të jenë të pranishëm në këtë seancë dhe në vijim, duke e cilësuar procesin si një “farsë të drejtësisë me regji”.
