Tensionet mes SHBA dhe Iranit po hyjnë në një fazë të re, me deklarata kontradiktore mbi negociatat për përfundimin e luftës. Shtëpia e Bardhë ka konfirmuar se bisedimet “po ecin me ritëm”, ndërsa Irani i mohon zyrtarisht negociatat direkte, duke pranuar vetëm shkëmbim mesazhesh përmes ndërmjetësve.
Sipas zyrtarëve amerikanë, po punohet për organizimin e një takimi në Pakistan, që mund të shërbejë si rrugëdalje nga konflikti. Megjithatë, ministri i Jashtëm iranian Abbas Araghchi e hodhi poshtë idenë e negociatave, duke e cilësuar ndryshimin e tonit nga SHBA si “pranim i dështimit”, pasi më herët Uashingtoni kërkonte “dorëzim pa kushte”.
Ndërkohë, situata në terren mbetet shumë e tensionuar. Vendet e Gjirit si Emiratet e Bashkuara, Kuvajti dhe Bahreini kanë interceptuar raketa dhe dronë, ndërsa sirenat e alarmit janë aktivizuar në disa zona. Sulmet dhe kundërsulmet po vazhdojnë për javën e katërt radhazi.
Në zhvillime të tjera, inteligjenca amerikane paralajmëron se Irani po forcon mbrojtjen në ishullin strategjik Kharg, duke zhvendosur trupa dhe sisteme ajrore në pritje të një operacioni të mundshëm amerikan.
Në të njëjtën kohë, presidenti amerikan Donald Trump deklaroi se Irani “dëshiron shumë një marrëveshje”, por ka frikë ta pranojë publikisht. Nga ana tjetër, zyrtarë izraelitë shprehen skeptikë për çdo mundësi reale negociatash.
Konflikti ka prekur edhe ekonominë globale dhe transportin detar, me rreth 20 mijë marinarë të bllokuar në rajon dhe probleme serioze në lundrim për shkak të ndërhyrjeve në sistemet GPS dhe rrezikut të sulmeve.
