Bashkimi Europian është distancuar nga “Bordi i Paqes”, ndërsa presidentja e Komisionit Europian, Ursula von der Leyen, ka refuzuar të marrë pjesë në takimin inaugurues. Megjithatë, blloku europian ka shprehur gatishmëri për të bashkëpunuar me Shtetet e Bashkuara në zbatimin e një plani paqeje për Rripin e Gazës.
Sipas raportimit të “New York Times”, në takimin joformal që pritet të mbahet në Uashington do të prezantohet një plan me vlerë miliarda dollarë për rindërtimin e Gazës. SHBA dhe Emiratet e Bashkuara Arabe thuhet se janë të gatshme të kontribuojnë secila me nga 1 miliard dollarë për këtë projekt.
Ndërkohë, disa nga rreth 20 vendet pjesëmarrëse pritet të ofrojnë mijëra trupa për krijimin e një force sigurie që do të vendoset në territor, duke shënuar një hap të ri në përpjekjet ndërkombëtare për stabilizimin e rajonit pas konfliktit.
Pavarësisht mungesës në takimin themelues, BE sinjalizon se mbetet një aktor i rëndësishëm në proceset diplomatike dhe në përpjekjet për arritjen e paqes në Lindjen e Mesme.
