Larja e maces nuk rekomandohet në shumicën e rasteve, pasi mund të dëmtojë lëkurën dhe të shkaktojë probleme shëndetësore. Këshilla vjen nga veterineri italian Luca Giansanti, i cili thekson se macet janë natyrshëm shumë të pastra dhe zakonisht kujdesen vetë për higjienën e tyre.
Sipas tij, përdorimi i sapunëve mund të irritojë lëkurën e kafshës dhe të nxisë lëpirje të tepruar. Kur macja nuk ndien më aromën e saj natyrale, ajo përpiqet ta rikthejë duke u pastruar vazhdimisht – një sjellje që mund të bëhet problematike.
Rreziqet që sjell larja
Ekspertët paralajmërojnë disa pasoja të mundshme:
- lëpirje e tepërt që mund të shkaktojë rënie të qimeve
- gëlltitje e sasive të mëdha të qimeve dhe formim i “topave të qimeve”, që shpesh shoqërohen me të vjella
- dobësim i shtresës natyrale mbrojtëse të lëkurës, duke e bërë më të ndjeshme ndaj infeksioneve
Në vend të banjës, rekomandohet thjesht krehja e rregullt, e cila ndihmon në largimin e qimeve të vdekura dhe ruajtjen e shëndetit të lëkurës.
Kur duhet ndërhyrja e pronarit
Megjithatë, ka disa raste të rralla kur pastrimi nga njeriu bëhet i domosdoshëm. Për shembull, macet me qime të gjata mund të ndoten në zonën perianale dhe të mos arrijnë të pastrohen vetë.
Në këto situata këshillohet:
- përdorimi i sapunëve jo irritues
- shpëlarje e kujdesshme
- tharje shumë e mirë, për të shmangur kërpudhat dhe infeksionet
Ekspertët theksojnë se çdo ndërhyrje duhet bërë me kujdes, pasi ndryshimi i mikrobiotës së lëkurës mund të favorizojë probleme dermatologjike.
