Kryeministrja japoneze Sanae Takaichi ka dalë fituese e madhe nga zgjedhjet e parakohshme, pasi partia e saj, Partia Liberale Demokratike (LDP), siguroi mbi 310 nga 465 vendet në dhomën e ulët të parlamentit, sipas transmetuesit publik NHK.
Rezultati shënon herën e parë që nga Lufta e Dytë Botërore që një parti e vetme arrin një shumicë prej dy të tretash, ndërsa koalicioni qeverisës ka kaluar 340 mandate.
Në reagimin e saj, Takaichi falënderoi votuesit që “përballuan të ftohtin dhe rrugët me borë për të votuar”, duke theksuar se kërkonte një mandat të fortë për të çuar përpara politikat ekonomike dhe fiskale.
Një bast që rezultoi fitues
Thirrja për zgjedhje të parakohshme u pa si një rrezik politik, por popullariteti i lartë i Takaichit – e cila u bë liderja e parë grua në historinë e Japonisë – u përkthye në një fitore bindëse.
Supermazhoranca i jep qeverisë mundësinë të anashkalojë votat në dhomën e sipërme dhe madje të propozojë ndryshime kushtetuese.
Mbështetje ndërkombëtare dhe stil i fortë drejtimi
Liderja konservatore ka marrë edhe mbështetjen e presidentit amerikan Donald Trump, i cili e ka cilësuar atë një udhëheqëse “të fortë dhe të mençur”.
E krahasuar shpesh me Margaret Thatcher për stilin e saj vendimtar dhe mbrojtjen e vlerave tradicionale, Takaichi ka fituar popullaritet edhe falë energjisë në komunikim dhe pranisë aktive në rrjetet sociale.
Sfidat që e presin
Mandati i ri i jep asaj dorë të lirë për të përballuar disa nga problemet më të mëdha të Japonisë, si plakja e shpejtë e popullsisë, rritja e kostos së jetesës, dobësimi i jenit dhe tensionet me Kinën.
Marrëdhëniet me Pekinin janë përkeqësuar sidomos pas deklaratave të saj për Tajvanin, duke nxitur reagime ekonomike dhe ushtarake nga Kina.
Pavarësisht kritikave për ritmin e lartë të punës dhe vendimet e forta, rezultati i zgjedhjeve e konsolidon Takaichin si një nga figurat më të fuqishme politike në Azi.
