Publikimi i disa milionë dokumenteve të reja nga Departamenti Amerikan i Drejtësisë ka rikthyer në qendër të vëmendjes rrjetin e gjerë social dhe financiar të Jeffrey Epstein, dënuar për krime seksuale.
Dosjet hedhin dritë mbi lidhjet e tij me figura të fuqishme nga politika, biznesi, diplomacia dhe teknologjia, duke ngritur pikëpyetje të reja mbi atë se sa dinin bashkëpunëtorët e tij për aktivitetet e paligjshme. Megjithëse autoritetet nuk kanë ngritur akuza ndaj shumë prej emrave të përmendur dhe disa prej tyre kanë deklaruar se i ndërprenë marrëdhëniet me Epstein përpara se skandalet të bëheshin publike, analiza sugjeron se ndikimi i tij shtrihej në nivelet më të larta të elitës globale.
Zbulimet kanë sjellë pasoja politike edhe jashtë SHBA-së. Në Britani, ish-ministri dhe diplomati Peter Mandelson po përballet me hetime të reja, ndërsa çështja ka prekur edhe familjen mbretërore, ku Princi Andrew kishte arritur më herët një marrëveshje në një padi për abuzim seksual. Reagime ka pasur edhe në Norvegji, ku princesha e kurorës Mette-Marit pranoi se kishte treguar “gjykim të dobët” në lidhjen e saj me Epstein. Ndërkohë, disa figura të njohura, përfshirë ish-presidentë amerikanë dhe liderë biznesi, kanë mohuar çdo përfshirje në veprimtari kriminale.
Dokumentet tregojnë se Epstein ndërtoi për dekada një rrjet takimesh elitare, eventesh private dhe kontakteve me ndikim, edhe pas dënimit të tij në vitin 2009. Skandali po ushqen debat mbi përgjegjësinë morale të elitave dhe rrezikon të thellojë mosbesimin publik ndaj institucioneve, ndërsa shumë pyetje – nga origjina e pasurisë së tij deri te niveli i dijenisë së bashkëpunëtorëve – mbeten ende pa përgjigje.
Ata që festuan me të mund të mos kenë përgjegjësi penale. Por sa prej tyre ishin moralisht bashkëfajtorë?/CNN
