Të paktën 28 persona kanë humbur jetën dhe 64 të tjerë janë plagosur, pasi një vinç ndërtimi u shemb mbi një tren pasagjerësh në lëvizje në provincën Nakhon Ratchasima, në Tajlandën qendrore.
Ngjarja e rëndë ndodhi rreth orës 09:00 me orën lokale, kur treni, që udhëtonte nga Bangkok drejt provincës Ubon Ratchathani, u godit nga vinçi, i cili po punonte në një projekt ndërtimi të linjës hekurudhore me shpejtësi të lartë Tajlandë–Kinë.
Sipas autoriteteve, treni po transportonte të paktën 195 pasagjerë, mes tyre studentë dhe punëtorë. Si pasojë e përplasjes, një vagon doli nga shinat, ndërsa një tjetër mori flakë. Mes të plagosurve janë edhe fëmijë dhe të moshuar, përfshirë një fëmijë 1 vjeç dhe një pasagjer 85 vjeç, ndërsa 7 persona ndodhen në gjendje të rëndë.
Një anëtar i stafit të trenit, i mbijetuar nga aksidenti, tregoi se pasagjerët u hodhën në ajër nga forca e goditjes, ndërsa pamjet nga vendngjarja tregojnë vagonë të përmbysur dhe dëme të mëdha materiale.
Autoritetet shëndetësore njoftuan se të gjithë pasagjerët janë evakuuar, ndërsa operacionet e shpëtimit u zhvilluan me intensitet të lartë. Për shkak të aksidentit, më shumë se një duzinë linjash hekurudhore janë pezulluar ose devijuar, ndërsa pasagjerëve u është ofruar rimbursim i plotë.
Kryeministri i Tajlandës, Anutin Charnvirakul, ka kërkuar që dikush të mbahet përgjegjës dhe të ndëshkohet, duke theksuar se aksidente të tilla lidhen me neglizhencë dhe shkelje të standardeve të sigurisë. Ai urdhëroi një hetim të plotë dhe të gjithanshëm mbi shkaqet e ngjarjes.
Ambasada kineze në Bangkok sqaroi se nuk ka kompani apo punëtorë kinezë të përfshirë, duke nënvizuar se segmenti ku ndodhi aksidenti po ndërtohej nga një kompani tajlandeze.
Aksidentet e rënda në kantieret e ndërtimit nuk janë të rralla në Tajlandë, shpesh të lidhura me zbatim të dobët të rregullave të sigurisë, çka ka rikthyer shqetësimet për standardet në projektet madhore infrastrukturore.
