Një rrëshqitje masive dheu është regjistruar në fshatin Bashaj, duke shkaktuar dëme të rënda në rrugën lidhëse me pjesën tjetër të zonës dhe duke lënë të izoluar mbi 100 banorë.
Si pasojë e rrëshqitjes, qarkullimi është ndërprerë plotësisht, ndërsa banorët nuk kanë asnjë mundësi lëvizjeje apo furnizimi normal. Situata konsiderohet problematike, sidomos për familjet me të moshuar, fëmijë dhe persona që kanë nevojë për ndihmë shëndetësore.
Banorët i kanë bërë thirrje institucioneve që të ndërhyjnë urgjentisht për hapjen e rrugës dhe rikthimin e lidhjes me zonat përreth, duke theksuar se çdo vonesë mund të përkeqësojë më tej gjendjen.
Autoritetet vendore dhe strukturat e emergjencave civile janë vënë në dijeni për ngjarjen, ndërsa pritet ndërhyrja e grupeve të specializuara për pastrimin e masës së dheut dhe stabilizimin e terrenit.
Situata mbetet në monitorim, ndërkohë që reshjet e vazhdueshme të shiut rrisin rrezikun për rrëshqitje të tjera në zonë.
