GAZA / TEL AVIV – Izraeli ka vendosur të revokojë licencat e 37 organizatave humanitare që veprojnë në Gaza dhe në Bregun Perëndimor të pushtuar, duke urdhëruar ndërprerjen e aktivitetit të tyre brenda 60 ditëve, me efekt nga 1 janari.
Mes organizatave të prekura janë edhe emra të njohur ndërkombëtarë si ActionAid, International Rescue Committee dhe Norwegian Refugee Council.
Autoritetet izraelite thanë se organizatat nuk kanë përmbushur kriteret e reja të regjistrimit, përfshirë dorëzimin e “të dhënave të plota dhe të verifikueshme” për stafin e tyre, çka sipas Izraelit është thelbësore për të parandaluar infiltrimin e elementëve terroristë në strukturat humanitare.
Reagim i fortë ndërkombëtar
Vendimi është kritikuar ashpër nga ministrat e Jashtëm të 10 vendeve, përfshirë Mbretërinë e Bashkuar, Francën, Kanadanë, Japoninë dhe vendet nordike. Në një deklaratë të përbashkët, ata paralajmëruan se mbyllja e detyruar e këtyre organizatave do të ketë “pasoja të rënda për aksesin në shërbime jetike, përfshirë kujdesin shëndetësor”.
Sipas tyre, situata humanitare në Gaza mbetet “katastrofike” dhe qeveria izraelite duhet të garantojë që organizatat humanitare të operojnë në mënyrë të qëndrueshme dhe të parashikueshme.
Izraeli: ndihma do të vazhdojë
Ministria izraelite për Çështjet e Diasporës, që mbikëqyr regjistrimin e OJQ-ve, deklaroi se masat nuk do të ndikojnë në rrjedhën e ndihmës humanitare, e cila sipas saj vazhdon të hyjë në Gaza përmes kanaleve të miratuara, përfshirë agjencitë e OKB-së dhe partnerë bilateralë.
Sipas ushtrisë izraelite dhe autoritetit COGAT, disa nga organizatat e pezulluara nuk kanë sjellë ndihmë gjatë armëpushimit të fundit dhe kontributi i tyre përbënte vetëm rreth 1% të volumit total të ndihmave.
Paralajmërim nga OKB dhe OJQ-të
Forumi Humanitarian Country Team, që përfshin agjenci të OKB-së dhe mbi 200 organizata lokale e ndërkombëtare, ka paralajmëruar se sistemi i ri i regjistrimit “minon në thelb” operacionet humanitare në Gaza dhe Bregun Perëndimor. Sipas tij, kriteret janë të paqarta, politike dhe bien ndesh me parimet bazë humanitare dhe të drejtën ndërkombëtare.
Ky forum thekson se OJQ-të ndërkombëtare aktualisht menaxhojnë shumicën e spitaleve fushore, qendrave të kujdesit parësor, shërbimeve të ujit dhe ushqimit, si dhe programeve për fëmijët me kequshqyerje akute në Gaza.
Ministri izraelit për Çështjet e Diasporës, Amichai Chikli, deklaroi se “ndihma humanitare është e mirëpritur, por shfrytëzimi i saj për terrorizëm nuk do të tolerohet”.
