Struktura e Posaçme kundër Korrupsionit dhe Krimit të Organizuar ka përfunduar një seri kontrollesh në kuadër të hetimeve për dosjen e njohur si “Balluku”, ku janë përfshirë zyrtarë dhe biznesmenë. Burime zyrtare bëjnë me dije se janë kryer deri tani 34 kontrolle, pjesë e një aksioni më të gjerë që në total parashikon 54 kontrolle në banesa, zyra dhe subjekte private.
Kontrollet janë ushtruar nga agjentët e Byroja Kombëtare e Hetimit, me urdhër të prokurorëve të SPAK, si pjesë e hetimit ndaj zv.kryeministres Belinda Balluku dhe bashkëpunëtorëve të saj, disa prej të cilëve ndodhen aktualisht nën masa sigurie.
Sipas burimeve, pjesa më e madhe e kontrolleve është përqendruar te stafi i Ministrisë së Infrastrukturës, Autoriteti Rrugor Shqiptar dhe Korporata Elektroenergjetike Shqiptare. Ndër objektivat e kontrollit ka qenë edhe banesa e shefes së kabinetit të zv.kryeministres, Sindi Dushku.
Top Channel raporton se, me vendim të gjyqtarit Erjon Çela, në ditët në vijim do të procesohen edhe 20 kontrolle të tjera, të orientuara drejt biznesmenëve dhe punonjësve të institucioneve të përfshira në hetim. Aksioni është zhvilluar kryesisht nga BKH, ndërsa Policia e Shtetit nuk ka marrë pjesë në kontrollet e ambienteve të brendshme dhe në mbledhjen e provave.
Më herët, janë kontrolluar edhe banesat e ish-zyrtarëve të lartë si Sajmir Kuçi (ish-punonjës i ARRSH), Erald Elezi (ish-drejtor i KESH, nën masë “arrest shtëpie” për dosjen e tunelit të Llogarasë), Gentian Gjyli (ish-kreu i ARRSH, po ashtu në “arrest shtëpie”), si dhe Marsel Hoxha, Jonida Çeço dhe Viola Haxhihademi, ish-sekretare e përgjithshme e Ministrisë së Infrastrukturës dhe aktualisht drejtuese në KESH.
Hetimet vijojnë për dosjen ku zyrtarja më e lartë nën akuzë mbetet zv.kryeministrja Belinda Balluku, për të cilën SPAK i është drejtuar Kuvendi i Shqipërisë me kërkesë për heqjen e imunitetit dhe dhënien e autorizimit për masën e heqjes së lirisë.
