Një tërmet me magnitudë 4.9 ballë të shkallës Rihter është regjistruar mbrëmjen e sotme në Greqi, pranë zonës së Kalavrytës, sipas të dhënave zyrtare të Qendrës Europiane Mesdhetare të Sizmologjisë (EMSC).
Lëkundja sizmike ka ndodhur në orën 20:48 (UTC), ose 22:48 me orën lokale, me epiqendër rreth 36 kilometra në lindje-juglindje të Patras dhe vetëm 7 km në perëndim-jugperëndim të Kalavrytës. Tërmeti kishte një thellësi të cekët, rreth 6 kilometra, çka bën që lëkundjet të ndihen më qartë në zonat pranë epiqendrës.
Sipas EMSC, nuk ka rrezik për tsunami, ndërsa deri më tani nuk raportohet për dëme materiale apo persona të lënduar. Banorë të zonës kanë raportuar në aplikacionin e EMSC se tërmeti është ndjerë për disa sekonda.
Autoritetet sizmologjike greke dhe shërbimet e emergjencës janë në monitorim të situatës, ndërsa priten verifikime të mëtejshme nga Instituti Gjeodinamik i Athinës (NOA).
Greqia është një nga zonat më aktive sizmike në Europë dhe lëkundje të tilla konsiderohen të zakonshme, megjithatë autoritetet u bëjnë thirrje qytetarëve të qëndrojnë të qetë dhe të ndjekin njoftimet zyrtare.
