Pas disa orësh protestë pa incidente të rënda, tensionet janë rikthyer mbrëmjen e kësaj të mërkure përpara Kryeministrisë. Protestuesit kanë hedhur bomba molotov drejt godinës së qeverisë, ndërsa një karrige është përfshirë nga flakët, në një veprim që lidhet me ftesën e kryeministrit Edi Rama për dialog.
Incidentet nisën rreth orës 18:00, fillimisht me hedhjen e një kapsolle në drejtim të Kryeministrisë dhe më pas me përdorimin e bombave molotov.
Në vijim, protestuesit i vunë flakën një karrigeje, duke e shoqëruar veprimin me thirrjen: “Hajde për dialog tani”.
Nga karriget e dialogut te flakët
Kryeministri Edi Rama kishte vendosur sërish karrige përpara godinës së qeverisë, si simbol i ftesës së tij për të diskutuar me studentët.
Por oferta e kreut të qeverisë nuk është pranuar nga protestuesit, të cilët vijojnë të kërkojnë dorëheqjen e tij.
Djegia e karriges u interpretua si një veprim simbolik kundër ftesës për dialog, ndërsa hedhja e molotovëve shënoi rikthimin e incidenteve të dhunshme pas disa orësh qetësie.
Dita e nëntë e protestave
Gjatë ditës së nëntë të protestave në Tiranë, studentë dhe pedagogë zhvilluan tubime dhe marshime pranë Ministrisë së Arsimit dhe Kryeministrisë.
Për disa orë, demonstratat u zhvilluan pa përplasjet e forta që kishin karakterizuar ditët e mëparshme.
Megjithatë, situata ndryshoi në mbrëmje, kur një grup protestuesish nisi hedhjen e mjeteve ndezëse drejt godinës së qeverisë.
Në raportimin fillestar nuk jepen të dhëna për persona të lënduar apo dëme të tjera të shkaktuara nga incidentet.
