Të paktën 159 persona kanë humbur jetën në Sri Lanka, ndërsa autoritetet vazhdojnë të luftojnë me përmbytjet që kanë goditur edhe pjesë të kryeqytetit, pasi cikloni i fuqishëm Ditwah shkaktoi shkatërrime masive në gjithë vendin.
Qendra e Menaxhimit të Fatkeqësive njoftoi të dielën, 30 nëntor, se reshje të tjera të dendura në ditët në vijim, ndërsa më shumë se 200 persona figurojnë ende të zhdukur. Mes tyre raportohet të jenë edhe pesë pjesëtarë të marinës, të cilët u panë për herë të fundit teksa përpiqeshin të neutralizonin situatën me ujërat që po vërshonin në lagunën Chalai, në verilindje të vendit.
Disa lagje janë zhytur plotësisht në baltë dhe mungesa e komunikimit ka bërë që disa zona ende të mos i raportojnë dëmet e plota. Në zona të tjera, reshjet e pandërprera kanë përmbytur fushat me oriz të sapombjellë, duke rrezikuar furnizimin me ushqim.
Edhe pjesa veriore e Kolombos po përballet me përmbytje serioze, pasi niveli i lumit Kelani vazhdon të rritet. Autoritetet thonë se edhe pse cikloni është larguar, reshjet e forta në zonat e thella po shkaktojnë vërshime të reja përgjatë brigjeve të lumit.
Gjendje e jashtëzakonshme
Presidenti Anura Kumara Dissanayake shpalli gjendjen e jashtëzakonshme të shtunën, 29 nëntor, për të menaxhuar pasojat e katastrofës dhe kërkoi ndihmë ndërkombëtare.
India u bë vendi i parë që reagoi, duke dërguar ndihma emergjente dhe helikopterë për operacionet e shpëtimit. Japonia gjithashtu njoftoi se do të dërgojë një ekip vlerësimi dhe ka premtuar mbështetje të mëtejshme.
Megjithëse reshjet janë lehtësuar, shumë rrugë në provincën më të goditur në qendër të vendit mbeten të pakalueshme. Autoritetet raportojnë se më shumë se 20 mijë banesa janë shkatërruar, ndërsa 122 mijë persona janë strehuar në qendra emergjente.
Totali i qytetarëve që kanë nevojë për ndihmë ka arritur në 833 mijë.
Trupat e ushtrisë, marinës dhe forcave ajrore po punojnë së bashku me punëtorë civilë dhe vullnetarë për të ndihmuar zonat më të prekura.
Rreth një e treta e vendit vijon të jetë pa energji elektrike ose ujë të pijshëm. Edhe lidhjet e internetit janë ndërprerë në shumë zona.
Ky ciklon është katastrofa natyrore më vdekjeprurëse në Sri Lanka që nga viti 2017, kur përmbytjet dhe rrëshqitjet e dheut shkaktuan mbi 200 viktima. Përmbytjet më të rënda të këtij shekulli në vend ndodhën në vitin 2003, kur u regjistruan 254 viktima.
/tvklan
