Një kurë kundër rënies së flokëve mund të jetë pranë zbulimit.
Studiues nga Universiteti i Tajvanit kanë zbuluar një serum që mund të rigjenerojë flokët brenda vetëm 20 ditësh, sipas një studimi të publikuar në revistën shkencore Cell Metabolism.
Sipas studimit, qelizat dhjamore nën lëkurë mund të riaktivizojnë rritjen e flokëve.
Si funksionon procesi
Studiuesit përdorën mostra lëkure nga minjtë për të monitoruar ndryshimet në indin dhjamor nënlëkuror, si dhe në folikulat e qimeve dhe qelizat që ndihmojnë në rritjen e tyre, pasi krijuan mikrodëmtime të kontrolluara për të nxitur reagime biologjike.
Pas dëmtimit të lëkurës, qelizat dhjamore filluan të shpërbëjnë yndyrën e depozituar përmes një procesi të quajtur lipolizë. Kjo çliroi acide yndyrore në lëkurë, të cilat vepruan si sinjale për qelizat burimore të qimeve për të rifilluar rritjen.
Kur shkencëtarët ndaluan këtë proces të shpërbërjes së yndyrës, rritja e qimeve u ndërpre.
Eksperimenti që solli rritje qimesh te minjtë
Për të testuar hipotezën, studiuesit lyen lëkurën e minjve me acide yndyrore për të parë nëse do të nxisnin rritjen e qimeve — dhe eksperimenti rezultoi i suksesshëm.
Në një nga testet, qimet rifilluan të rriteshin brenda 20 ditësh, kur trajtimi aplikohej çdo ditë.
Ky efekt u vërejt në disa eksperimente, por studiuesit theksuan se kërkimi është ende në fazat e hershme dhe nuk është testuar ende te njerëzit.
Lidhja mes inflamacionit të lëkurës dhe rritjes së qimeve
Rezultatet u shfaqën vetëm pas dëmtimit të lëkurës. Sipas studiuesve, inflamacioni i kontrolluar i lëkurës — i shkaktuar nga irritime kimike ose dëmtime të thella dermale — është treguar më parë se nxit rigjenerimin e flokëve dhe përdoret tashmë në disa trajtime klinike kundër rënies së flokëve.
Megjithatë, mekanizmat e saktë përmes të cilëve qelizat burimore “zgjohen” pas dëmtimeve mbeten ende të paqartë.
Potencial për trajtime të reja me acide yndyrore natyrale
Eksperimentet treguan se acidet yndyrore mono-të pangopura mund të ndihmojnë në rigjenerimin e flokëve. Meqë këto substanca janë natyrale dhe të sigurta për trupin e njeriut, ato mund të bëhen një opsion i vlefshëm për trajtimin e rënies së flokëve në të ardhmen.
Ekspertët: Rezultate interesante, por ende shumë herët për njerëzit
Në një intervistë për Fox News Digital, dermatologu i certifikuar në Nju Jork, Dr. Brendan Camp, e quajti këtë zbulim “të rëndësishëm” në një periudhë me interes të madh për trajtimet kundër rënies së flokëve.
“Por këto rezultate janë shumë paraprake dhe, pasi eksperimentet nuk janë kryer në lëkurën e kokës te njerëzit, mund të mos jenë të zbatueshme për ta,” – theksoi ai.
Ai shtoi se duhen më shumë kërkime për ta testuar këtë metodë si trajtim të mundshëm për alopecinë androgjenetike, formën më të zakonshme të rënies së flokëve tek burrat dhe gratë.
Deri në miratimin e metodës për përdorim klinik, Dr. Camp këshillon personat që përballen me rënie flokësh të vazhdojnë me trajtimet e provuara shkencërisht dhe të konsultohen me një dermatolog të certifikuar.
