Kryetari i Partisë Mundësia, Agron Shehaj, ka reaguar ashpër ndaj zv.kryeministres dhe ministres së Infrastrukturës, Belinda Balluku, pas lajmit se ajo është thirrur nga Prokuroria e Posaçme (SPAK) për t’u paraqitur ditën e hënë me avokatin e saj.
Në një video të publikuar në rrjetet sociale, Shehaj e ka cilësuar “të paimagjinueshëm” reagimin e Ballukut, e cila ndodhet në Zvicër, ku ka shpërndarë pamje nga udhëtimi me tren.
> “Është e pabesueshme. Të hënën Balluku është thirrur nga SPAK-u dhe është thirrur bashkë me avokatin e saj. Balluku çfarë bën? I hipën avionit, shkon në Zvicër dhe fillon e bën xhiro me tren e na jep mend. Na thotë sa të bukur janë trenat në Zvicër dhe sa bukur do ishte që këto trena të ishin edhe në Shqipëri. Është e paimagjinueshme!”, – deklaron Shehaj.
Duke përmendur edhe hetimet ndaj ish-ministrit Ilir Beqaj dhe ish-kryebashkiakut të Tiranës, Erion Veliaj, kreu i Partisë Mundësia thekson se “nuk do të jetë e largët dita kur edhe Edi Rama do të dalë para drejtësisë”.
> “Na dukej e pabesueshme që Balluku një ditë do të dilte para drejtësisë, dhe ja që kjo po ndodh. Na dukej e pabesueshme që edhe Veliaj një ditë do të dilte para drejtësisë, dhe ajo ndodhi. E njëjta gjë me Beqajn dhe shumë të tjerë. Dhe e njëjta gjë ka për të ndodhur edhe me Ramën. Duhet të kemi besim – e ardhmja e Shqipërisë nuk mund të jetë modeli i korrupsionit i kësaj qeverie. Duhet të vazhdojmë të luftojmë, mos të dorëzohemi”, – u shpreh Shehaj.
Në përshkrimin që shoqëron videon, Shehaj ka shtuar se pas zhvillimeve të fundit, Belinda Balluku duhet të japë dorëheqjen menjëherë.
