Pas përfundimit të ndeshjes mes Dinamo City dhe Jagiellonias, të zhvilluar mbrëmjen e së enjtes në “Air Albania”, kryeqyteti u përfshi nga tensione dhe akte dhune mes tifozëve.
Fillimisht, pranë stadiumit, një prej huliganëve polakë u dhunua nga një grup tifozësh shqiptarë. Ai u identifikua si personi që disa orë më herët ishte filmuar duke përdhosur bustin e Heroit Kombëtar, Gjergj Kastrioti Skënderbeu, në qendër të Tiranës. Pamjet e gjestit të pahijshëm shkaktuan zemërim të madh në rrjetet sociale, duke nxitur reagime të ashpra nga qytetarët.
Ndërkohë, pamje të tjera të mbërritura në redaksi tregojnë momentin kur autobusi i tifozëve të Jagiellonias sulmohet në afërsi të Rinasit nga një grup tifozësh shqiptarë. Nga videoja dëgjohen thirrje të shumta, ndërsa tensioni mes palëve ka detyruar ndërhyrjen e forcave të shumta të rendit për të shmangur përshkallëzimin e dhunës.
Më herët, JOQ Albania publikoi video ku huliganët polakë shfaqeshin duke kryer gjeste fyese para bustit të Skënderbeut, si dhe duke valëvitur një flamur me mbishkrimin provokues “Kosova është Serbi”. Tifozeria polake është e njohur për kore raciste dhe slogane të tipit “Vritini Shqiptarët”, ndërsa prej kohësh cilësohet si grup radikal pro-serb.
Ndeshja e vlefshme për fazën “Play-Off” të Ligës së Konferencave përfundoi në barazim 1-1, por Dinamo City u eliminua për shkak të humbjes 3-0 në sfidën e parë në Poloni.
