Disa yje u larguan nga kjo botë qetësisht, të tjerë mes misterit dhe teorive të pafundme. Ja disa nga rastet më të bujshme, ku fama nuk mjaftoi për t’i shpëtuar një fundi të papritur apo të pashpjeguar.
Marilyn Monroe (1962) – Ikona e Hollivudit u gjet e vdekur në shtratin e saj, e rrethuar nga hape gjumi dhe anidepresivë. Aksident? Apo heshtje e detyruar për shkak të njohjes së tepërt të familjes Kennedy? Pas më shumë se 60 vitesh, ende nuk ka përgjigje të qarta.
Bruce Lee (1973) – Sipas raportit zyrtar, një reaksion ndaj një qetësuesi i shkaktoi edemë cerebrale. Megjithatë, teoritë për helmim apo konflikte personale nuk janë shuar kurrë.
Jim Morrison (1971) – Lideri karizmatik i The Doors u gjet i vdekur në vaskën e apartamentit të tij në Paris. Nuk u krye autopsi, ndërsa partnerja organizoi një varrim të shpejtë. Franca ka mbetur në heshtje që prej asaj dite.
Elvis Presley (1977) – Mbreti i Rock-ut u gjet pa jetë në banjën e vilës së tij në Memphis. Zyrtarisht, arrest kardiak. Jozyrtarisht, një përzierje e rrezikshme medikamentesh dhe ushqimesh të yndyrshme.
Natalie Wood (1981) – Aktorja u mbyt gjatë një udhëtimi me jaht me bashkëshortin Robert Wagner dhe aktorin Christopher Walken. Dëshmitë kontradiktore dhe thashethemet për një grindje mbetën pa zbardhur.
Brandon Lee (1993) – Gjatë xhirimeve të filmit The Crow, u qëllua me një armë që duhej të ishte false, por nuk ishte. Djali i Bruce Lee vdiq para kamerave, duke ushqyer besimin se “mallkimi” i familjes vazhdon.
Kurt Cobain (1994) – Zyrtarisht vetëvrasje me armë gjahu. U gjetën substanca të paligjshme dhe një letër lamtumire, por detajet e plagës dhe teoritë që përfshijnë Courtney Love vazhdojnë të nxisin dyshime.
Tupac Shakur (1996) – U qëllua për vdekje në makinën e tij pas një sherri në Las Vegas. Megjithëse pati dëshmitarë, çështja mbetet e pazgjidhur dhe teoritë konspirative janë të shumta.
Heath Ledger (2008) – Me ankth dhe skenarin e Joker-it ende në dhomë, Ledger nuk u zgjua kurrë. Vdekja u shpall aksidentale, por la pas një ndjenjë se fshihej diçka më e thellë.
David Carradine (2009) – U gjet i vdekur në një hotel në Bangkok, i lidhur me litarë. Disa flasin për një incident intim të shkuar keq, të tjerë për vrasje.
Brittany Murphy (2009) – Vdiq në moshën 32-vjeçare, zyrtarisht nga shkaqe natyrore. Pak muaj më vonë, edhe bashkëshorti i saj vdiq në të njëjtën shtëpi. Teoritë shkojnë nga helmimi mjedisor deri te neglizhenca mjekësore.
Anton Yelchin (2016) – Aktori i Star Trek humbi jetën tragjikisht kur makina e tij e shtypi pas një porte në shtëpi. Shkak u bë një defekt në frenin automatik. Ishte vetëm 27 vjeç.
Matthew Perry (2023) – Ylli i Friends u gjet i pajetë në xhakuzi në shtëpinë e tij. Nuk u gjetën substanca të ndaluara në gjak, por kishte medikamente të përshkruara. Pyetjet mbi shkaqet e vërteta mbeten të hapura.
Sinead O’Connor (2023) – U gjet pa shenja jete në shtëpinë e saj në Londër, një vit pasi humbi të birin. Një artiste e fuqishme dhe e përkushtuar, vdekja e saj mbylli një jetë të mbushur me betejë dhe dhimbje.
